Ангилал: medeelel
Тархины хавдарын оношлогоо, эмчилгээ
Оношлогоо
Гол үзлэг шинжилгээ:
Эмчийн ерөнхий үзлэг – биеийн ерөнхий байдлыг шинжлэн тогтооно.
Эмчийн мэдрэлийн тусгайлсан үзлэг – хавдрын улмаас биеийн рефлекс, булчин, мэдрэхүй зэрэгт үүссэн өөрчлөлтүүдийг илрүүлнэ.
СТ, MRI буюу компьютер томографи, соронзон резонанс-томографи шинжилгээ – хавдрын байршил, хэмжээ, тархины эдийн гэмтэл зэргийг илрүүлэх найдвартай аргууд
Биопси – хавдрын эсийн гарал үүслийг тогтоох зорилгоор хийнэ.
Нэмэлт шинжилгээ:
Нүдний угийн дуран: харааны мэдрүүлийн хөхлөгт хаван, харааны мэдрүүлийн хатингаршил зэрэг нь хавдрын байршил, үе шатаас хамааран илэрнэ.
ЭЭГ буюу тархины цахилгаан бичлэг – хавдар тархины гадарт ойр байрласан тохиолдолд хэсэг газрын биопотенциалын өвөрмөц бус өөрчлөлт илрэнэ.
Ялган оношлогоо
Хатуу хальсан доорхи цусан хураа, судасны цүлхэн, артери-венийн гажиг, буглаа, туберкулом, саркойдын мөхлөг, шимэгчийн уйланхай зэрэг эмгэгүүд гавлын дотоод даралт ихэсгэж ижил шинж тэмдэг илрэх учир эдгээр өвчнөөс ялган оношлоно.
Эмчилгээ
Хавдрын төрөл,үе шат, түүний байршил, хэмжээнээс хамааран хавсарсан эмчилгээг хийнэ. Эмчилгээний төрлүүд:
Мэс засал: гол эмчилгээний нэг боловч өвчтөний биеийн байдал болон хавдрын байршлаас хамааран мэс засал эмчилгээ хийгдэнэ.
Туяа эмчилгээ – рентген туяа, гамма туяа протоныг ашиглан хавдрын эсийг үхүүлэх зорилготой. Мэс засал эмчилгээний дараа болон мэс засал эмчилгээ хийх боломжгүй тохиолдолд хийгддэг.
Хими эмчилгээ – хавдрын эсийг үхүүлэх үйлчилгээтэй эмийн бэлдмэл. Мэс засал эмчилгээний дараа тархины хавдар дахисан тохиолдолд уг эмчилгээ хийгдэнэ.